طارق العويني: نلقا طفلة مطيشة في زبلة ونحب نتبناها

طارق العويني في برنامج #فكرة_سامي_الفهري :

" نهار الإربعاء كنت قاعد نفطر في الدار وخرجت متعدي بحذا كوم زبلة نسمع في حس جويد مقطوع عليه نفس كاينو حس قطاطس.. حليت ساشي كان مسكر...مانجمش نوصفلك شنوة الي صارلي وقتها نلقى رضيعة حديثة الولادة في ساشي متاع فضلات ملفوفة في خيشة سوداء مسكرين عليها... الي قام بالعملية هذيا مانجمش نعطيه وصف.. الطقس بارد ولقيتها عريانة منغير حتى دبش. الفيديو هانو موثق... حليت الساشي خرجت الطفلة خذات نفس وبكات وقتها.... حاجة مأساة اليوم هذيكا ... انا عندي نهارين مانرقدش راني كل ما نحط راسي الفيديو ديما يتعاود قدامي... كانت عندها زروقية في يدها و في رقبتها و باردة ... شنوة ذنبها هي... هي انسانة خلقها ربي.. الي صار جريمة.... البنية حطيتها في كابيش انطلقت بيها إلى أقرب مركز قابلت رئيس مركز هو قام بالإجراءات اللازمة وبعد مشينا للسبيطار و بالمناسبة تحية للامن الي حلونا الطريق فيسع باش وصلنا... غرفة استعجالية بطاقم طبي يستنو في الطفلة اول ما دخلت بنور عملوها تخطيط على قلب يلقاو القلب لاباس نظفوها من الفضلات لبسوها وحطولها الاكسجين الحمد الله منعت ربي كتبلها عمر جديد..سميتها "نور" خاطر خرجت من ظلام الساشي لنور الدنيا و مكتوبلها بش تعيش.. الطفلة تعلقت بيها هي بنتي موش من صلبي و نحب نتبناها"